Кейинги йилларда мамлакатимизда барча соҳалар қатори суд-ҳуқуқ тизимида ҳам кенг кўламли ислоҳотлар амалга оширилмоқда. Маъмурий суд соҳасидаги янгиланишлар фуқаролар ва тадбиркорлик субъектлари ҳуқуқларининг самарали ҳимоясини кафолатли таъминлаш, одил судлов самарадорлигини оширишга хизмат қилмоқда.

Айниқса, Президентимизнинг 2025 йил 30 январда қабул қилинган “Фуқаролар ва тадбиркорлик субъектларининг ҳуқуқларини суд орқали ҳимоя қилишнинг замонавий механизмлари­ни жорий этиш бўйича қўшимча чора-тадбирлар тўғ­рисида”ги қарори бу борадаги ислоҳотларнинг изчил давоми сифатида эътироф этилаётгани бежиз эмас.

Ушбу қарорга мувофиқ:

• давлат органлари билан муносабатларда фуқаролар ва тадбиркорлик субъектлари ҳуқуқлари, эркинликлари ва қонуний манфаатларининг ишончли ва самарали ҳимоя этилишини устувор равишда таъминлаш;

• фуқаролар ва тадбиркорлик субъектларининг бузилган ёки низолашилаётган ҳуқуқлари, эркинликлари ва қонуний манфаатларини тиклашда суднинг фаол иштироки принципини қўллаш механизмларини кенгайтириш;

• давлат органлари ва мансабдор шахсларнинг фаолияти устидан самарали суд назоратини ўрнатиш;

• маъмурий суд ишларини юритишда низоларни судгача ҳал қилиш механизмларини такомиллаштириш;

• фуқаролар ва тадбиркорлик субъектларининг ҳуқуқларини ҳимоя қилишда маъмурий судларнинг ролини кучайтириш орқали аҳолининг суд тизимига бўлган ишончини янада ошириш;

• давлат органлари томонидан суд қарорлари ижро этилиши устидан назоратнинг таъсирчан механизмларини тўлиқ жорий этиш;

• маъмурий юстиция тизими ривожланган давлатлар тажрибаси асосида маъмурий судлар фаолиятини такомиллаштириб бориш асосий йўналишлар сифатида белгиланди.

Президент қарорида қонунга ва судга нисбатан ҳурмат муносабатини шакллантириш масаласига устувор аҳамият берилган. Шу мақсадда қарори, ҳаракати ё ҳаракатсизлиги устидан шикоят қилинган давлат органи мансабдор шахси ёки унинг вакили суд мажлисида мажбурий иштирок этишини таъминлашга қаратилган қонун лойиҳасини ишлаб чиқиш масаласи кун тартибига қўйилди.

Бўлажак қонун лойиҳасида, жумладан:

• давлат органи қарори ёки унинг мансабдор шахси ҳаракати ё ҳаракатсизлиги устидан берилган аризани маъмурий судларда кўришда мансабдор шахс ёки унинг вакили зарур тушунтиришлар бериш учун суд муҳокамасида иштирок этиши шарт ҳисобланиши;

• давлат органи мансабдор шахси ёки унинг вакили иштирок этиши зарур деб топилган ҳолларда маъмурий ишни кўриб чиқиш кейинга қолдирилиши, унинг иштироки ишнинг ҳар томонлама, тўлиқ ва тўғри ҳал қилинишига тўсқинлик қилмаган тақдирда, иш давлат органи мансабдор шахси ёки унинг вакили иштирокисиз кўриб чиқилиши;

• давлат органи мансабдор шахси ёки унинг вакили суд муҳокамасига келмаган ва унинг келмаганлиги суд томонидан узрли деб топилмаган тақдирда, мансабдор шахсга нисбатан суд жаримаси қўлланилишини белгилаш назарда тутилди.

Шунингдек, илғор хорижий тажрибадан келиб чиққан ҳолда, маъмурий суд иш юритувида ишларнинг тезкор ва сифатли кўриб чиқилишини таъминлашга ҳамда фуқаролар ва тадбиркорлик субъектларига ўз ҳуқуқларини ҳимоя қилиш учун қўшимча имкониятлар яратишга қаратилган дастлабки эшитув институтини жорий этиш белгиланмоқда.

Унга кўра:

• маъмурий суд иш юритувида дастлабки эшитув қонунда назарда тутилган ҳолларда ўтказилади;

• дастлабки эшитувда аризачининг талаблари ва жавобгарнинг эътирозлари аниқлаштирилади, аризадаги камчиликларни бартараф этиш чоралари кўрилади;

• талабларни исботлаш учун аризачига зарур далилларни ҳамда жавобгарга фикрни ёзма равишда тақдим этиш бўйича тушунтиришлар берилади;

• аризадаги талаблар ва ишдаги далилларга судья томонидан дастлабки ҳуқуқий баҳо берилади, яъни талабларни аниқлаштириш, ишга дахлдор бўлмаган тарафларни алмаштириш, қўшимча жавобгарни жалб қилиш ва бошқалар амалга оширилади. Бунда кўрилаётган ишнинг мазмунан ҳал этилиши бўйича якуний фикр билдиришга йўл қўйилмайди;

• дастлабки эшитув ариза судга келиб тушган кундан эътиборан йигирма кундан кечиктирмай ўтказилади, ушбу муддат суд муҳокамаси учун белгиланган муддатга киритилмайди;

• дастлабки эшитув натижасига кўра, аризани қайтариш ёки иш бўйича суд муҳокамасини тайинлаш тўғрисида ажрим чиқарилади.

Маъмурий судларнинг нуфузи ва ролини кучайтириш мақсадида Президент қарори билан маъмурий судга низоларни ҳал этиш жараёнида судга ҳурматсизлик қилиниши ва суднинг хусусий ажрими бўйича чоралар кўрмасликка оид ҳуқуқбузарликлар аниқланганда, маъмурий ҳуқуқбузарликлар тўғрисидаги ишларни кўриш ваколати берилмоқда.

Маъмурий суд соҳасида амалга оширилиши белгиланган ушбу ислоҳотлар кенг қамровли ва уни амалга ошириш жараёни муайян вазифалар бажарилишини талаб қилади. Шу сабабли Президент Қарорининг 7-банди билан Ўзбекистон Республикаси маъмурий суд ишларини юритиш тўғрисидаги қонунчиликни такомиллаштириш концепцияси ҳамда Ўзбекистон Республикаси маъмурий суд ишларини юритиш тўғрисидаги қонунчиликни такомиллаштириш бўйича идоралараро комиссия тасдиқланди.

Ривожланган мамлакатларда айнан маъмурий судлар фуқаролар ва тадбиркорлик субъектларининг ҳуқуқлари ва қонуний манфаатлари ижро органлари томонидан бузилишининг олдини олишда, уларни ғайриқонуний қарорлар, ҳаракатлар ё ҳаракатсизликдан ҳимоя қилишда муҳим ўрин эгаллайди.

Шу маънода давлат органлари билан муносабатларда фуқаролар ва тадбиркорлик субъектлари ҳуқуқлари ва қонуний манфаатларининг самарали ҳимоя этилишини таъминлаш ҳамда маъмурий суд ишларини юритишни такомиллаштириш зарур.

Шунинг учун Концепциянинг:

– “Маъмурий суд ишларини юритишда фуқаролар ва тадбиркорлик субъектларининг ҳуқуқлари, эркинликлари ва қонуний манфаатларини ишончли ҳимоя қилиш механизмларини такомиллаштириш” деб номланувчи бўлимида 20 та вазифа;

– “Фуқаролар ва тадбиркорлик субъектларининг бузилган ёки низолашилаётган ҳуқуқлари, эркинликлари ва қонуний манфаатларини тиклашда суднинг фаол иштироки принципини қўллаш механизмларини кенгайтириш” деб номланувчи бўлимида 5 та вазифа;

– “Маъмурий суд ишларини юритишга халқаро стандартларга ва илғор хорижий тажрибага мувофиқ янги институт ва тартибларни жорий этиш” деб номланувчи бўлимида 13 та вазифа – жами 38 та вазифа белгилаб берилди.

Президент қарори билан тасдиқланган Идоралараро комиссия зиммасига ҳам қатор вазифалар юкланган. Хусусан, Комиссия уч ой муддатда янги таҳрирдаги Маъмурий суд ишларини юритиш тўғрисидаги кодекс лойиҳасини тайёрлаш жараёнига халқаро ташкилотларнинг экспертлари ва мутахассисларини жалб этиш масаласи кўриб чиқилишини таъминлаши ҳамда 2026 йил 1 июлга қадар янги таҳрирдаги Маъмурий суд ишларини юритиш тўғрисидаги кодекс лойиҳасини белгиланган тартибда Президент Администрациясига киритиши лозим.

Мухтасар айтганда, Ўзбекистон Президентининг суд-ҳуқуқ соҳасини ривожлантиришга қаратилган мазкур қарори “Инсон қадри учун” ғояси асосида қабул қилинган бўлиб, у адолатли суд тизимини шакллантириш, халқ манфаати ва инсон қадр-қимматини суд йўли орқали самарали ҳимоя қилиш ҳамда фуқароларнинг одил судловга бўлган ишончини янада оширишга хизмат қилади.

Акмал Муродов,

Навоий вилояти

маъмурий суди раиси

Мамлакатимизда 2025 йил 1 январдан бошлаб, жиноят ишини юритишга масъул шахслар рўйхатига “тергов судьяси” лавозими қўшилди. Ўзбекистон Республикаси Президентининг 2024 йил 10 июнда қабул қилинган «Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида»ги Фармони бу янги лавозимнинг жорий этилишига ҳуқуқий асос бўлиб хизмат қилди.

Мазкур Фармондан келиб чиққан холда, 2025 йил 28 январда “Ўзбекистон Республикаси айрим қонун ҳужжатларига шахснинг ҳуқуқ ва эркинликларини ишончли ҳимоя қилиш кафолатларини янада кучайтиришга қаратилган ўзгартиш ва қўшимчалар киритиш тўғрисида”ги қонун қабул қилиниб, матбуотда эълон қилинди.

Янги қонунга мувофиқ, тергов судьялари томонидан жиноят ишлари бўйича судга қадар иш юритиш босқичида процессуал қарорларга санкция бериш ва маъмурий ҳуқуқбузарликлар тўғрисидаги ишларни кўриб чиқиш масалаларини қонунчиликда белгилаш мақсадида, тергов судьяларининг ваколатлари жумласига киритилган ишларни кўриб чиқиш асослари ҳамда тартибини назарда тутувчи ўзгартиш ва қўшимчалар киритилди.

Жумладан, Жиноят-процессуал кодексига жиноят ишини юритишга масъул давлат органлари ва мансабдор шахслари рўйхатига янги субъект – тергов судьяси ва унинг ваколатлари киритилди. Тергов судьяси якка тартибда иш юритиши, қонунда белгиланган тартибда судга қадар иш юритиш босқичида шахснинг ҳуқуқлари, эркинликлари ва қонуний манфаатларига риоя этилиши устидан суд назоратини амалга ошириши белгиланди.

Қонун билан тергов судьясининг асосий ваколатларига:

– қамоққа олиш ёки уй қамоғи тарзидаги эҳтиёт чорасини қўллаш;

– қамоқда сақлаш ёки уй қамоғи муддатини узайтириш;

– ушлаб туриш муддатини 48 соатгача узайтириш;

– паспортнинг (ҳаракатланиш ҳужжатининг) амал қилишини тўхтатиб туриш;

– айбланувчини лавозимидан четлаштириш;

– шахсни тиббий муассасага жойлаштириш;

– айбланувчининг тиббий муассасада бўлиши муддатини узайтириш;

– мурдани эксгумация қилиш;

– почта-телеграф жўнатмаларини хатлаш;

– прокурорнинг гувоҳ ва жабрланувчининг (фуқаровий даъвогарнинг) кўрсатувларини олдиндан мустаҳкамлаш;

– тинтув ўтказиш;

– телефонлар ва бошқа телекоммуникация қурилмалари орқали олиб бориладиган сўзлашувларни эшитиб туриш, улар орқали узатиладиган ахборотни олиш;

– мол-мулкни хатлаш тўғрисидаги илтимосномаларни кўриб чиқиш кабилар кириши белгиланди.

Эътиборлиси, бу тоифадаги ишлар бўйича суд қарорлари тергов судьяси томонидан алоҳида хонада чиқарилиши ҳам назарда тутилмоқда.

Шунингдек, гувоҳ ва жабрланувчининг (фуқаровий даъвогарнинг) кўрсатмаларини олдиндан мустаҳкамлаш, паспортнинг (ҳаракатланиш ҳужжатининг) амал қилишини тўхтатиб туриш тўғрисидаги илтимосномани кўриб чиқиш ва мурдани эксгумация қилиш ҳақидаги илтимосномани кўриб чиқиш суриштирув ва дастлабки тергов юритилаётган жойдаги тергов судьяси томонидан кўрилади.

Мазкур суднинг судьяси бўлмаган ёки унинг иштирокини истисно этувчи ҳолатлар бўлган тақдирда, иш Қорақалпоғистон Республикаси суди, вилоят, Тошкент шаҳар суди раисининг кўрсатмасига биноан, тегишли суднинг тергов судьяси томонидан кўриб чиқилади.

Шу билан бирга, қонунда илгари қонун ҳужжатларида тартиби аниқ белгиланмаган тинтув ўтказиш, телефонлар ва бошқа телекоммуникация қурилмалари орқали олиб бориладиган сўзлашувларни эшитиб туриш, улар орқали узатиладиган ахборотни олиш, мол-мулкни хатлаш тўғрисидаги илтимосномаларни қўзғатиш, кўриб чиқиш ва бу бўйича тергов судьяси томонидан чиқариладиган суд ажрими талаблари, суд ажримини апелляция тартибида кўриш тартиби ҳам белгиланди.

Янги қонун билан Маъмурий жавобгарлик тўғрисидаги кодексга ҳам тегишли ўзгартишлар киритилди. Ушбу кодекснинг 245-моддасида назарда тутилган жиноят ишлари бўйича судлар томонидан шу кунгача кўриб келинаётган барча маъмурий ҳуқуқбузарлик тўғрисидаги ишлар эндиликда жиноят ишлари бўйича туман (шаҳар) судининг тергов судьяси томонидан кўриб чиқилади. 

Бундан ташқари “Судлар тўғрисида”ги қонунга жиноят ишлари бўйича судлар таркиби билан боғлиқ ўзгартиш киритилди. Яъни “жиноят ишлари бўйича туман, шаҳар суди раис, судьялар, тергов судьялари ва халқ маслаҳатчиларидан иборат бўлади”, деб белгиланди. Хулоса қилиб айтганда, қонунчиликдаги ушбу ўзгартишлар тергов устидан суд назоратини амалга оширишда, фуқароларнинг ҳуқуқ ва эркинликларини ишончли ҳимоя қилишда, ҳуқуқни муҳофаза қилувчи органлар ва судлар томонидан ишдаги барча ҳолатларни синчковлик билан тўла, ҳар томонлама ва холисона кўриб чиқишга асосланган ҳолда далилларга тўғри баҳо беришда, ҳар бир далил ишга алоқадорлиги, мақбуллиги ва ишончлилиги нуқтаи назаридан баҳоланишига яқиндан ёрдам беради.

Шерзод Абдуқодиров,

жиноят ишлари бўйича

Бўка тумани суди раиси

Давлатимиз раҳбарининг 2024 йил 10 июндаги “Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида”ги Фармонига мувофиқ, жорий йилнинг 1 январидан буён туман, шаҳар судларида тергов судьялари ўз фаолиятини бошлади.

2025 йил 28 январь куни имзоланган “Ўзбекистон Республикасининг айрим қонун ҳужжатларига шахснинг ҳуқуқ ва эркинликларини ишончли ҳимоя қилиш кафолатларини янада кучайтиришга қаратилган ўзгартириш ва қўшимчалар киритиш тўғрисида”ги Қонуни билан тергов судьясининг ваколатлари белгиланди. Мазкур қонун асосида Жиноят-процессуал кодексига ҳам бир қатор ўзгартиш ва қўшимчалар киритилди.

Аввало, Жиноят-процессуал кодекси янги 31-1-модда билан тўлдирилиб, тергов судьясининг ваколатлари белгиланди. Унга кўра, тергов судьяси якка ўзи иш тутиб, ушбу Кодексда назарда тутилган тартибда судга қадар иш юритиш босқичида шахснинг ҳуқуқлари, эркинликлари ва қонуний манфаатларига риоя этилиши устидан суд назоратини амалга оширади.

Шуни алоҳида таъкидлаш лозимки, қамоққа олиш ёки уй қамоғи тарзидаги эҳтиёт чорасини қўллаш, қамоқда сақлаш ёки уй қамоғи муддатини узайтириш, ушлаб туриш муддатини қирқ саккиз соатгача узайтириш, паспортнинг (ҳаракатланиш ҳужжатининг) амал қилишини тўхтатиб туриш, айбланувчини лавозимидан четлаштириш, шахсни тиббий муассасага жойлаштириш, айбланувчининг тиббий муассасада бўлиши муддатини узайтириш, мурдани эксгумация қилиш, почта-телеграф жўнатмаларини хатлаш, прокурорнинг гувоҳ ва жабрланувчининг (фуқаровий даъвогарнинг) кўрсатувларини олдиндан мустаҳкамлаш, тинтув ўтказиш, телефонлар ва бошқа телекоммуникация қурилмалари орқали олиб бориладиган сўзлашувларни эшитиб туриш, улар орқали узатиладиган ахборотни олиш, мол-мулкни хатлаш тўғрисидаги илтимосномаларни кўриб чиқиш тергов судьясининг ваколатлари жумласига киради.

Қолаверса, кодекснинг 121-3-моддаси “Кўрсатувларни олдиндан мустаҳкамлаб қўйиш тўғрисидаги илтимоснома суриштирув, дастлабки тергов юритилаётган жойдаги жиноят ишлари бўйича туман (шаҳар) судининг тергов судьяси томонидан, мазкур суднинг судьяси бўлмаган ёхуд кўрсатувларни олдиндан мустаҳкамлаб қўйиш тўғрисидаги илтимосномани кўриб чиқишда унинг иштирокини истисно этувчи ҳолатлар мавжуд бўлган тақдирда эса Қорақалпоғистон Республикаси суди, вилоят, Тошкент шаҳар суди раисининг кўрсатмасига биноан бошқа тегишли суднинг тергов судьяси томонидан якка тартибда кўриб чиқилади” деган сўзлардан иборат биринчи қисм билан тўлдирилди.

Бундан ташқари, Жиноят-процессуал кодекси аввал мавжуд бўлмаган 158-1, 158-2 ва 158-3-моддалар билан ҳам тўлдирилдики, улар тинтув ўтказиш жараёни билан боғлиқ. Дарҳақиқат, тинтув ўтказиш учун асослар мавжуд бўлган тақдирда прокурор, терговчи ёки суриштирувчи тинтув ўтказиш тўғрисида илтимоснома қўзғатиш ҳақида уни ўтказиш учун асосларни баён этган ҳолда қарор чиқаради. Бу қоида кодекснинг 158-1-моддасида ўз аксини топган.

Тинтув ўтказиш тўғрисида илтимоснома қўзғатиш ҳақидаги қарорга илтимосномани асословчи зарур материаллар илова қилинади.

Терговчининг ёки суриштирувчининг тинтув ўтказиш тўғрисида илтимоснома қўзғатиш ҳақидаги қарори ва зарур материаллар прокурорга юборилади. Прокурор эса илтимосноманинг асослилигини текшириб, унга рози бўлган тақдирда, ўша қарор ва зарур материалларни судга юборади.

Кечиктириб бўлмайдиган ҳолларда тинтув терговчининг ёки суриштирувчининг қарорига асосан суднинг розилигисиз ўтказилиши мумкин, бироқ кейинчалик суд ва прокурор ўтказилган тинтув ҳақида йигирма тўрт соат ичида хабардор қилинади. Хабарномада кечиктириб бўлмайдиган ҳолатлар аниқ кўрсатилиши керак. Тинтув ўтказиш ҳақидаги қарорнинг қонунийлигини текшириш учун мазкур хабарномага терговчининг ёки суриштирувчининг тинтув ўтказиш ҳақидаги қарорининг, тинтув баённомасининг ва зарур материалларнинг кўчирма нусхалари илова қилинади. Мазкур хабарномани ва унга илова қилинган материалларни олгач, судья ўтказилган тинтувнинг қонунийлигини қирқ саккиз соат ичида ушбу Кодекснинг 158-2 ва 158-3-моддалари тартибида текширади ҳамда унинг қонунийлиги ёки қонунга хилофлиги тўғрисида ажрим чиқаради. Агар судья ўтказилган тинтувни қонунга хилоф деб топса, тинтув ўтказиш чоғида олинган барча далиллар ушбу Кодекснинг 95-1-моддасига мувофиқ номақбул деб топилади.

Тинтув ўтказиш тўғрисидаги илтимоснома суриштирув ёки дастлабки тергов юритилаётган жойдаги жиноят ишлари бўйича туман (шаҳар) судининг тергов судьяси томонидан, мазкур суднинг судьяси бўлмаган ёхуд тинтув ўтказиш тўғрисидаги илтимосномани кўриб чиқишда унинг иштирокини истисно этувчи ҳолатлар мавжуд бўлган тақдирда эса Қорақалпоғистон Республикаси суди, вилоят, Тошкент шаҳар суди раисининг кўрсатмасига биноан бошқа тегишли суднинг тергов судьяси томонидан якка тартибда кўриб чиқилади.

Тинтув ўтказиш тўғрисидаги илтимоснома материаллар келиб тушган пайтдан эътиборан саккиз соатдан кечиктирмай ёпиқ суд мажлисида кўриб чиқилади. Суд мажлисида прокурор, зарур бўлган тақдирда терговчи, суриштирувчи иштирок этади. Бу суд мажлиси прокурорнинг маърузаси билан бошланади, у мазкур тергов ҳаракатини ўтказиш заруратини асослаб беради. Кейин тақдим этилган материаллар текширилади.

Шундан кейин судья ажрим чиқариш учун алоҳида хонага киради.

Судья илтимосномани кўриб чиққач, тинтув ўтказиш ёки уни рад этиш ҳақида ажрим чиқаради. Судьянинг тинтув ўтказишни рад этиш тўғрисидаги ажрими асослантирилган бўлиши керак. Мазкур ажрим ўқиб эшиттирилган пайтдан эътиборан кучга киради. Суд тинтув ўтказишни прокурорга, суриштирувчига ёки терговчига топширади.

Судьянинг тинтув ўтказиш тўғрисидаги ёки тинтув ўтказишни рад этиш ҳақидаги ажрими устидан ўзига нисбатан тинтув ўтказилган шахс ажрим ижро этилган кундан эътиборан йигирма тўрт соат ичида апелляция тартибида шикоят бериши, прокурор ажрим чиқарилган кундан эътиборан шу муддат ичида апелляция тартибида протест билдириши мумкин.

Апелляция шикояти (протести) ажримни чиқарган суд орқали берилади, мазкур суд йигирма тўрт соат ичида уларни материаллар билан бирга апелляция инстанцияси судига юбориши шарт. Апелляция инстанцияси судининг судьяси мазкур материалларни шикоят (протест) билан бирга келиб тушган пайтдан эътиборан йигирма тўрт соатдан кечиктирмай якка тартибда кўриб чиқиши керак.

Эслатиб ўтиш жоиз, апелляция шикояти (протести) берилиши суднинг тинтув ўтказиш тўғрисидаги ажрими ижросини тўхтатиб турмайди.

Тинтув ўтказиш рад этилган тақдирда, мазкур масала бўйича такроран судга мурожаат қилишга тинтув ўтказишни тақозо этадиган янги ҳолатлар юзага келганда йўл қўйилади.

Юқоридаги қонунга биноан, Жиноят-процессуал кодексига телефонлар ва бошқа телекоммуникация қурилмалари орқали олиб бориладиган сўзлашувларни эшитиб туриш, улар орқали узатиладиган ахборотни олиш, мол-мулкни хатлашга оид ўзгартиш ва қўшимчалар ҳам киритилди.

Нодиржон КИМСАНОВ,

жиноят ишлари бўйича
Косонсой туман судининг
тергов судьяси

Убайдулла Мингбоев Ўзбекистон суд тизимининг йирик арбоби, узоқ йиллик тажрибага эга бўлган судья ва раҳбар, адолат ва қонун устуворлигини таъминлаш йўлида фидокорона хизмат қилган етук инсон. У кишининг саъй-ҳаракатлари натижасида суд тизимида улкан ислоҳотлар амалга оширилиб, одил судловнинг самарадорлиги ошди, суд ҳокимиятининг мустақиллигини мустаҳкамлаш, судьялар фаолиятининг шаффофлигини таъминлаш ва уларнинг ижтимоий ҳимоясини кучайтириш борасида муҳим қадамлар ташланди.

Устознинг ҳаёти ва фаолияти адолат, қонун устуворлиги ва инсон ҳуқуқларини ҳимоя қилишга бағишланган десам, муболаға бўлмайди.

Самарали меҳнатлари, адолат ва ҳақиқат йўлидаги хизматлари мамлакатимиз суд тизимининг юксалишида муҳим аҳамият касб этади. У кишининг раҳбарлигида амалга оширилган ислоҳотлар мамлакатимизда қонун устуворлигини таъминлашга, фуқароларнинг ҳуқуқ ва эркинликларини ҳимоя қилишга хизмат қилмоқда.

Одамлар доимо инсонлардаги ҳалоллик ва поклик, тўғрисўзлик ва адолатпарварлик каби хислатларни қадрлашади. Убайдулла Мингбоевда ҳам мана шундай хислатлар уйғунлашган. У ҳар бир ишга масъулиятни ҳис қилган ҳолда сабр-тоқат ва диққат билан ёндашиши, адолатни таъминлаш учун интилиши, ҳар қандай вазиятда ҳам инсон ҳуқуқларини ҳимоя қилиши билан одамлар, халқ эътиборини қозонган.

Судьяликдек улуғ касбнинг юксак масъулияти ва машаққатини мус­таҳкам иродаси, пок виждони, имон-эътиқоди билан оқлаб келиш ҳаммага ҳам насиб қилавермайди. Чунки судьянинг қабул қилган биргина қарори инсонларнинг тақдирини бутунлай ўзгартириб юбориши мумкин. Шу сабабли ҳам судьядан адолатли бўлиш учун, аввало, ўз устида ишлаши, чуқур билим, етарли ҳаётий тажриба ва устозлар ўгитларига мудом амал қилиб бориши талаб этилади. Юртимизнинг одил судлов тизимида ҳалол, меҳнатсевар ва адолатли судьяларнинг етишиб чиқишида, уларнинг касбий этикасини ривожлантиришда устознинг хизматлари ниҳоятда катта.

Убайдулла ака одил судловни таъминлаш борасида салмоқли ишларни амалга ошириш билан бир қаторда инсонларнинг маънавиятини юксалтириш, уларга маърифат улашиш мақсадида адолат, билим ва маърифат, олийжаноблик, меҳр-муҳаббат ва ахлоқий қоидаларни сингдирувчи асарлар ҳам яратган. У кишининг қаламига мансуб “Олий суд: кеча ва бугун”, “Суд шундай ҳокимиятки…”, “Суд – фуқаролар ҳимоячиси”, “Одил судлов маданияти ва одоби”, “Етти пуштни билмоқ истаги”, “Касб-корим адолат бўлди”, “Адолат мезони”, “Истакларим”, “Судьялик – улкан масъулият”, “Шукрона”, “Адолат инсонпарварликнинг олий нуқтаси” ва “Покланиш палласи” каби асарлар бугун адолатни қарор топтиришга масъул бўлган судьяларнинг маънавиятини юксалтиришга хизмат қилмоқда. Ушбу асарлар турли соҳа ва барча ёшдаги китобхонларнинг жавонидан ўрин олган.

Адолатпарварлик судьяларнинг эл олдидаги обрў-эътибори ошишида муҳим омил ҳисобланади. Суд маҳкамаси нуфузининг ошишида, ҳуқуқий ҳокимиятнинг чинакам мустақиллиги таъминланишида, одил судловга эришиш даражасини юксалтиришда Убайдулла Мингбоевнинг муносиб ҳиссаси бор. 

Шунингдек, у кишининг ташаббуси билан Ўзбекистон судьялари ассоциацияси ва Суд тизими фахрийларини ижтимоий қўллаб-қувватлаш жамоатчилик маркази ташкил этилиб, бугунги кунда улар тўлақонли фаолият юритиб келаётганлигини эътироф этиш жоиз. Ана шу ташкилотларнинг фаолияти самараси ўлароқ, юксак касб ва маънавий фазилатларга эга бўлган суд ходимлари таркибини шакллантириш мақсадида суд тизими фахрийлари билан алоқалар яхши йўлга қўйилган. “Устоз ва шогирд” мактаби яратилиб, фахрийлар ҳолидан хабар олиш, байрамларда йўқлаб, бир дастурхон атрофида суҳбатларидан баҳраманд бўлиш яхши анъанага айланган. Ўтказилаётган “Уч авлод учрашувлари”да соҳа фахрийлари, бугунги кунда фаолият кўрсатаётган судьялар ва судьялик лавозимига захирада турган ёш номзодлар, талабалар учрашиб, суд тизими фахрийларининг ҳаётий тажрибаси билан ўртоқлашмоқдалар.

У. Мингбоевнинг беқиёс хизматлари ҳукуматимиз томонидан муносиб эътироф этилиб, “Жасорат” медали, “Ўзбекистон Республикасида хизмат кўрсатган юрист” фахрий унвони ва “Фидокорона хизматлари учун” ордени билан мукофотланган. Албатта, бу мукофотлар устознинг ҳуқуқ тизимидаги кўп йиллик меҳнатлари самарасидир.

Бутун умрини адолатни қарор топтиришга, жамиятда суд тизимининг обрўсини ошириш ва нуфузини юксалтиришга, фуқароларнинг ҳақ-ҳуқуқларини ҳимоя қилишга бағишлаган Убайдулла Мингбоев бугун табаррук тўқсон ёшни қарши олмоқда. Қутлуғ довон билан юзлашган устознинг умр дафтарига назар солган киши унинг ҳақиқий жонкуяр, фидойи, бошқаларни ҳам комилликка етакловчи, қалбларга зиё сочувчи улуғ сиймо эканлигига амин бўлади. У шу ёшда ҳам шогирдларига дунёни англашга кўмаклашиб, инсонийлик ва ҳаётий доноликни ўргатиб келмоқда.

Мухтасар айтганда, Убайдулла Мингбоевнинг ярим асрдан ошиқ самарали хизматларини эътироф этиб, уни адолатпарварлик мақомига эришган фидойи устоз десак, ҳақ гапни айтган бўламиз. Шогирдларга устозлик йўлида чарчаманг! 

Абдуқаюм МАҲКАМОВ,

Қашқадарё вилоят суди раиси

 

Олий суд Пленумининг навбатдан ташқари мажлисида айрим фуқаролик ишлари бўйича туманлараро ҳамда туманлараро иқтисодий судларга илк бор судьялик лавозимига тайинланган судьяларнинг қасамёд қабул қилиш маросими ўтказилди. 

Мажлисда Судьялар олий кенгашининг 2025 йил 22 январдаги қарорига муфовиқ судьялик лавозимда бўлишнинг биринчи беш йиллик муддатига тайинланган Ў. Мадрохимов, Ш. Якубов, Г. Эрназарова ва З. Мажидовнинг қасамёди эшитилди.

Тадбирда иштирок этган судьяларнинг ота-оналари ва яқинлари уларга энг яхши тилакларни билдирди.

Қасамёд қабул қилган 4 нафар янги судьяга судьялик гувоҳномалари билан бирга “Судьялар одоби кодекси” топширилди.

Бугунги кунда Янги Ўзбекистон суд тизимидаги шиддатли ислоҳотлар самарадорлигини таъминлашга муносиб ҳисса қўшиб келаётган устоз Убайдулла Мингбоев моҳир ҳуқуқшунос, тажрибали судья ва покдил, фидойи, юксак маънавиятли ҳамда адолатпарвар ватандошимиз сифатида мамлакатимизнинг суд-ҳуқуқ идораларида қарийб 60 йилдан буён фаол меҳнат қилмоқда. Бу хизматлари жамиятимиз ва давлатимиз томонидан муносиб эътироф этилиб, Убайдулла ака “Ўзбекистон Республикасида хизмат кўрсатган юрист” фахрий унвони, “Фидокорона хизматлари учун” ордени, “Жасорат” медали билан тақдирланган ва устозга Олий малака тоифаси берилган.

“Cудьянинг онгида – адолат, тилида – ҳақиқат, дилида – поклик бўлиши керак”. Ўзбекистон Республикаси Президенти Шавкат Мирзиёев мамлакат суд тизими вакиллари, судьялар олдига ана шундай ҳаққоний талабни қўйди. Давлатимиз раҳбарининг 2017 йил 13 июнда судьялар билан бўлиб ўтган тарихий учрашувида сўзлаган нутқи замирида суд тизимини фуқароларимизнинг ҳуқуқлари, эркинликлари ва қонуний манфаатларини ишончли ҳимоя қиладиган адолат қўрғонига айлантиришдек устувор мақсад ўз мужассамини топган.

Президентимиз Олий Мажлисга Мурожаатномасида ҳар қайси ҳуқуқни муҳофаза қилиш органи бевосита ўз ваколати доирасидан чиқмайдиган, бир-бирининг функциясини такрорламайдиган тизимни шакллантиришимиз шарт, деган қатъий мақсадни белгилаб берди.

Юртбошимиз таъбири билан айтганда, судларнинг асосий вазифаси адолатни қарор топтиришдан иборат. Бунинг учун суд ҳар бир иш юзасидан қонуний, асосли ва адолатли қарор чиқариши лозим.

Убайдулла ака Олий суднинг ўзида салкам 20 йил фаолият олиб борган, шу жумладан, қарийб 12 йил давомида – 1991-2002 йилларда Ўзбекистон Республикаси Олий судининг раиси лавозимида хизмат қилган.

Шунингдек, 2009 йилдан буён Ўзбекистон суд тизими фахрийларини ижтимоий қўллаб-қувватлаш жамоатчилик маркази раиси сифатида фаолият олиб бормоқда.

Маълумки, Истиқлолнинг дастлабки даврида, тарихан жуда қисқа муддатда, Ўзбекистон Республикаси Биринчи Президенти Ислом Каримов раҳбарлигидаги Конституциявий комиссия иштирокида мустақил Ўзбекистон Конституцияси ишлаб чиқилди ва қабул қилинди. Устоз Убайдулла Мингбоев ҳам аъзоси бўлган ушбу Комиссия саъй-ҳаракатлари билан Асосий Қонунимизда суд ҳокимиятининг конституциявий асосларининг устувор принциплари аниқ ифодалаб берилди.

Хусусан, давлат ҳокимиятининг қонун чиқарувчи, ижро этувчи ва суд тармоқларига бўлиниши энг муҳим конституциявий принцип сифатида белгиланди. Конституцияда, шунингдек, инсон ҳуқуқларининг давлат манфаатларидан, умумэътироф этилган халқаро ҳуқуқ нормаларининг эса, миллий ҳуқуқ нормаларидан устунлиги мустаҳкамланди.

Айни вақтда, судларни жазоловчи ва фақат давлат манфаатларини ҳимоя қилувчи органдан қонун устуворлигини ва инсон ҳуқуқлари ҳимоясини таъминловчи органга айлантиришга қаратилган яхлит суд ҳокимияти тизимини шакллантириш вазифаси кун тартибидан жой олди. Шу асосда юртимизда Конституциявий суд, Олий суд, умумий юрисдикция судлари жорий этилди. Жиноят, жиноят-процессуал, суд-ҳуқуқ ва бошқа йўналишларда қонунчилик асосини ташкил этувчи ҳуқуқий база яратилди.

Миллий тараққиётимизнинг ке­йинги мантиқий босқичида, яъни Президент Шавкат Мирзиёев ташаббуси билан қабул қилинган янги таҳрирдаги Ўзбекистон Конституцияси, шунингдек, Ҳаракатлар стратегияси, Тараққиёт стратегияси ва “Ўзбекистон-2030” стратегияси негизида мамлакатимизда суд-ҳуқуқ тизимини ҳуқуқий давлатни шакллантиришнинг муҳим таркибий қисми сифатида чуқур ислоҳ этиш ва эркинлаштириш бўйича янги концепция изчиллик билан ҳаётга татбиқ этилмоқда.

Сўнгги йилларда судлар ихтисослаштирилди, фуқаролик ва жиноий ишлар бўйича алоҳида судлар ташкил этилди. Судлар суд қарорларини ижро этиш каби ўзларига хос бўлмаган вазифалардан озод қилинди. Суд-ҳуқуқ тизимидаги бундай ҳаётбахш ислоҳотлар, ҳеч шубҳасиз, соҳа вакилларини нафақат мамнун этмоқда, айни чоғда, ўз фаолиятида самарали натижаларга эришишга рағбатлантирмоқда. Убайдулла ака Мингбоев бу борадаги энг тажрибали ва пешқадам инсонлардан, десак, асло муболаға бўлмайди.

Устоз Ўзбекистон Республикаси Олий судининг раиси бўлиб ишлаган йиллари, шунингдек, 2003-2017 йилларда Ўзбекистон Судьялари ассоциацияси раисининг биринчи ўринбосари, 2017-2018 йилларда ушбу Ассоциациянинг раиси сифатида фаолият кўрсатган даврда ўзининг кўп йиллик бой тажрибаси, самарали амалий ва маърифий-ижодий фаолияти билан ушбу янгиланишлар жараёнида фаол қатнашди.

Убайдулла ака Ўзбекистон Республикаси Олий Мажлиси Сенатининг 2018 йил 29 июндаги қарори билан 2018-2020 йилларда Ўзбекистон Республикаси Судьялар олий кенгаши раиси лавозимида хизмат қилди.

Бугунги кунда устоз Судьялар олий кенгашининг жамоатчилик асосидаги аъзосидир.

Бу ҳақда сўз юритганда, авваламбор, Президентимиз томонидан “Суд-ҳуқуқ тизимини янада ислоҳ қилиш, фуқароларнинг ҳуқуқ ва эркинликларини ишончли ҳимоя қилиш кафолатларини кучайтириш чора-тадбирлари тўғрисида”ги Фармоннинг қабул қилиниши суд ҳокимиятининг чинакам мустақиллигини, фуқаролар ҳуқуқ ва эркинликларининг ишончли ҳимоясини таъминлаш, одил судловга эришиш даражасини ошириш ҳамда суд-ҳуқуқ тизимини янада ислоҳ қилишни янги босқичга кўтаргани хусусида мухтасар тўхталиш лозим.

Ҳозирги куннинг конституциявий тамойилларидан келиб чиқиб, суд ҳокимияти мустақиллигининг конституциявий принципига риоя этилишини таъминлашга кўмаклашадиган ҳамда номзодларни танлаш ва судьялик лавозимига тайинлаш тизимини тубдан такомиллаштириш, судьяларнинг мазкур жараёндаги иштирокини кенгайтириш, юқори малакали судьялар корпусини шакллантириш учун масъул бўлган органнинг мақоми ҳамда ваколатларини ошириш тизимли йўлга қўйилди.

Янги таҳрирдаги Ўзбекистон Республикаси Конституциясининг алоҳида бир боби – ХХIII боб “Суд ҳокимияти” деб номланган. Бу бобдан 11 модда ўрин олган. Хусусан, Асосий Қонунимизнинг:

• 130-моддаси – одил судлов;

• 131-моддаси – суд тизими;

• 132-133-моддалари – Конституциявий суд фаолияти;

• 134-моддаси – Олий суд фаолияти;

• 135-моддаси – Судьялар олий кенгаши фаолияти;

• 136-моддаси – судьялар мустақиллиги ва дахлсизлиги;

• 137-моддаси – судларнинг очиқлиги;

• 138-моддаси – суд ҳужжатларининг мажбурийлиги;

• 139-моддаси – суд ишлари юритиладиган тиллар;

• 140-моддаси – судлар фаолиятини молиялаштиришга оид нормалардан иборатдир.

Президентимиз ҳар гал суд тизимидаги ўзгаришларга тўхталганда, авваламбор, адолат мавзусида атрофлича сўз юритиши бежиз эмас.

Чунки адолат тантана қилишида давлат ҳокимиятининг мустақил тармоғи бўлган суд тизимининг ўрни ва аҳамияти беқиёс.

Ушбу соҳа вакиллари инсон ҳаёти билан боғлиқ фаолият олиб боради.

Содда қилиб айтганда, иши судда кўрилган шахснинг кейинги тақдири кўп ҳолларда судья қабул қилган қарорга боғлиқ бўлади. Бирор кишининг ноҳақ айбланиши, масалан, қилмаган айби учун узоқ йилга озодликдан маҳрум этилишининг оқибатини тасаввур қилиш қийин эмас.

Биз Мир Алишер Навоийни улуғ шоир ва мутафаккир, давлат арбоби, илм-фан ва маданият, она тилимиз ва адабиётимиз ҳомийси, саховатпеша зот, авлиёлар авлиёси сифатида яхши биламиз ҳамда юксак қадрлаймиз.

Айни чоғда, Алишер Навоий серқирра ҳаётининг яна бир муҳим жиҳати борки, бу ҳам бўлса, ул зотнинг фиқҳ, яъни ҳуқуқшунослик илми билимдони эканидир.

Алишер Навоий ҳуқуқ бобидаги билим ва тажрибасини нафақат асарларида, балки давлат арбоби сифатида амалий фаолиятида ҳам изчил қўллаган. Ҳазрат асарларини мутолаа қилиш асносида, ҳуқуқ атамалари улуғ шоир томонидан жуда кенг маъноларда, айни вақтда, ниҳоятда аниқ ва жуда нуктадонлик билан ишлатилганини кўриш мумкин.

Масалан, Навоий “адл” сўзини адолат, тўғрилик, инсоф тушунчаларини англатиш учун ишлатса, ўз навбатида, “адолат” сўзини ҳаққоният, шафқатлилик, одиллик, диёнат маъноларида қўллаган. Эътибор қилинг, ушбу тушунчалар бугунги кунда адолат ва юксак инсонпарварлик негизида тубдан ислоҳ этилаётган мамлакатимиз суд-ҳуқуқ тизими фаолиятининг асосий мазмун-моҳияти билан том маънода уйғун ва ҳамоҳанг эзгу тамойиллардир!

Давлатимиз раҳбарининг “Суд-ҳуқуқ тизимини янада такомиллаштириш ва суд ҳокимияти органларига ишончни ошириш чора-тадбирлари тўғрисида”ги Фармони бу борадаги ислоҳотларнинг изчил ҳамда мантиқий давоми бўлди. Ушбу ҳужжат одил судловни амалга ошириш сифатини яхшилаш, жисмоний ва юридик шахсларнинг ҳуқуқлари, эркинликлари ва қонуний манфаатлари ҳимояси кафолатларини кучайтиришга хизмат қилади.

Модомики, Убайдулла аканинг бу борадаги ҳиссаси ҳақида сўз борар экан, устоз ўз касбини улуғлаш масаласига нафақат амалий, айни чоғда ижодий жиҳатдан ҳам, муносиб улуш қўшиб келаётганини таъкидлаш мақсадга мувофиқдир. У киши соҳанинг тарихи ва истиқболларига, бугунги кунда суд тизимида амалга оширилаётган ислоҳотларнинг мазмун-моҳияти ва аҳамиятига оид кўплаб рисолалар муаллифи ҳисобланади.

Устознинг “Олий суд: кеча ва бугун” (Тошкент, “Ўзбекистон”, 1994), “Суд шундай ҳокимиятки…” (Тошкент, “Шарқ”, 1999), “Суд – фуқаролар ҳимоячиси” (Тошкент, 2001), “Одил судлов маданияти ва одоби” (Тошкент, “Адолат”, 2004), “Адолат инсонпарварликнинг олий нуқтаси” (Тошкент, “ILM-ZIYO-ZAKOVAT”, 2021), “Судья ва суд ходимларига мурожаат” (Тошкент, Ўзбекистон Республикаси Олий суди, 2023) китоблари шулар жумласидандир.

Хусусан, устознинг “Судья ва суд ходимларига мурожаат” китобидан ўз ҳамкасбларига шундай чорлови ўрин олган: “Судьянинг касбий маҳорати шундаки, у ҳар бир мурожаатчи билан одоб-ахлоқ ва қонун-қоида тамойилларига қатъий риоя этган ҳолда муносабатга киришиши талаб этилади. Албатта, буларнинг барчаси сиз, азизларнинг маънавиятингиз ва олган тарбиянгизга ҳам кўп жиҳатдан боғлиқ”.

У. Мингбоев катта ҳаёт мактабини кўрган устоз аллома сифатида “Етти пуштни билмоқ истаги” (Тошкент, “Қатортол-Камолот”, 1999), “Касб-корим адолат бўлди” (Тошкент, “Янги аср авлоди”, 2003), “Адолат мезони” (Тошкент, “Нур-полиграф”, 2009), “Судьялик – улкан масъулият” (Тошкент, 2014), “Шукрона” (Тошкент, “Turon zamin ziyo”, 2015), “Истакларим” (Тошкент, 2017), “Покланиш палласи” (Тошкент, “Олтин қалам”, 2024) каби бир қатор оммабоп китоблар ҳам ёзган.

Убайдулла ака отахон судья сифатида, турли босқич судларида судья, суд раисининг ўринбосари ва суд раиси сифатидаги узоқ йиллик фаолияти натижаларига таянган ҳолда, суд маданиятининг моҳиятига назар ташлар экан, “одил судловнинг мақсади – адолат ва инсонпарварликдир”, деган эзгу хулосага келади. Бу фикр ҳар бир китобда суд жараёнининг маданияти, судда фуқароларни қабул қилиш маданияти, судьялик этикаси ҳамда суд маданиятининг замонавий моддий-техника таъминотига алоқадорлиги каби долзарб мавзулар ва ҳаётий мисолларда имкон қадар кенг очиб берилади.

Устоз Убайдулла аканинг ҳар бир янги китобини мутолаа қилиш асносида Президент Шавкат Мирзиёев мамлакатимиз суд-ҳуқуқ тизимидаги туб ижобий ўзгаришлар жараёнида суд ишини амалга ошириш ваколатига эга ва бунга маънавий ҳуқуқи бор процессуал шахс саналган судьялар олдига қўйган қатъий талаблар билан ўзим ўқиётган асар муаллифининг ҳаётий тамойиллари ўртасида ўзига хос муштарак хусусиятлар мавжуд эканига амин бўламан. Бу уйғун жиҳатлар, фикримча, қуйидагиларда намоён бўлади.

Биринчидан, судьялар ва суд ходимлари ўз хизмат фаолиятини адо этишда маънавий-ахлоқий қиёфаси, касбига доир вазифаларни бажариш билан боғлиқ ахлоқий меъёрларга эга бўлишлари шарт.

Иккинчидан, судьялар ўзларининг намунали интизоми, хушмуомалалиги ва муносиб хулқ-атворини намоён этиб, ҳамиша адолатга таянган ҳолда, қонун устуворлигини таъминлаши талаб этилади.

Учинчидан, судьяларнинг Ўзбекистон Республикаси номидан суд ҳужжати қабул қилишлари – улар зиммасига бениҳоя шарафли ва масъулиятли вазифа юклатилганини англатади. Бундан чиқадиган хулоса шуки, судьяларнинг ўз бурчига содиқлиги, тегишли ваколатларини нечоғли ҳалол ҳамда сидқидилдан адо этиши мустақил суд ҳокимиятининг обрўсини ва фуқароларда одил судлов ҳамда адолатга бўлган ишончни тубдан оширади.

Тўртинчидан, одил судловнинг бош мақсади – адолат ва инсонпарварликдир. Инсонпарварликнинг замирида юксак маданият мужассам. Маданият, ўз навбатида, халқимизнинг узоқ ўтмишига бориб тақалади. Негаки, халқимизнинг миллий табиатига хос бўлган жамики эзгу инсоний фазилатлар ана шу маданиятимизда жамланган. Шу маънода, судьяларнинг маданиятлилиги суд ишларини холисона, билимдонлик асосида, жамият ва халқ манфаати учун куюнчаклик билан адолатли ҳал этишида кўзга ташланади.

Бешинчидан, судьяларнинг жамоатчилик вакиллари олдида ўзини тута билиши, мулоҳаза билан иш тутиши, хушфеъл, одобли, камтарин ва ширинсухан бўлиши – бу нафақат судьянинг, балки мустақил суд ҳокимиятининг ҳам обрўсини оширади. Бурч масъулиятини чуқур англаган судья ўз устида мунтазам ишлаб, билим ҳамда тажрибасини ошириб бориши лозим.

Олтинчидан, судьялар ўз қасамёдига ҳамиша содиқ қолиши, виждонан иш тутиши, сабр-тоқатли ва мустаҳкам ирода эгаси бўлиши даркор. Халқ ва Ватанга бўлган садоқатини, ўзининг фидойилигини ўзгаларга муносабатида намоён этиши зарур.

Еттинчидан, судьялар зиммасидаги ваколатларни масъулият ва шараф билан адо этиши баробарида, обрў-эътиборли, адолатпарвар инсон сифатида атрофдагиларда яхши таассурот қолдириши ҳам фарзу қарз.

Адолат халқимиз учун азалдан тинч ва фаровон ҳаёт мезони, барча эзгуликлар манбаи бўлиб келган. Амир Темур бобомиз “Куч — адолатда” деган ҳикматга амал қилиб, давлат бошқарувини ташкил қилиш, эл-юртнинг тинчлиги ва ободлигини таъминлашга эришган. Улуғ аждодимиз узук-муҳридаги ушбу адолатпарвар шиор муҳташам Оқсаройнинг ҳозирги кунгача сақланиб келаётган асосий пештоқида “Адолат – давлатнинг асоси ва ҳукмдорлар шиори!”, деган янада чуқур мазмунда битиб қўйилганини таъкидлаш жоиз.

Шу ўринда устоз Убайдулла Мингбоевнинг “Етти пуштни билмоқ истаги” номли китобида битилган мана бу ҳаётий сатрлар Соҳибқирон аждодимиз ўгитларига нечоғли ҳамоҳанг эканлигига эътиборни қаратгимиз келди: “Инсон эсон-омон юрса, сабр-қаноат билан яшаса, кўп нарсани кўрар экан. Мен бу гапларни ўз ҳаётим мисолида айтяпман. Гоҳида ўйга толаман, мустақил Ўзбекистонимиз Олий судининг биринчи раиси бўлганимдан, биринчи Конс­титуциямиз лойиҳасини тузишда иштирок этганимдан қониқиш ҳосил қиламан. Республикамизда биринчи бор “Судлар тўғрисида”ги қонунни тайёрлашда ишчи гуруҳга раҳбарлик қилганимни ҳам, 30–35-йилларда қатағон қилинганларнинг, 83-86-йилларда “Ўзбеклар иши” деб ноҳақ қамоқда ётганларнинг кўпларига адолатли суд қарорлари чиқарганимизни ҳам Тангри таолонинг менга кўрсатган инояти, берган неъмати деб биламан. Ҳарқалай, бу ишлар ҳам осонликча кечгани йўқ. Гоҳида ҳар бир иш учун, ундаги ҳар бир тақдир учун бевосита кураш олиб боришга тўғри келди… Мен қаерда ва қайси мансабда ишламай, адолатли фикр юритишни ва ҳар ишда беғараз бўлишни касб қилдим, оиладагиларимдан ҳам, дўстларимдан ҳам, қўл остимда ишлайдиган шогирдларимдан ҳам шуни талаб қилдим”.

Шундан келиб чиқиб айтиш мумкинки, судья шахсида ўз мужассамини топган жамики яхши фазилатлар – одил судловни таъминлашнинг муҳим шарти. Бинобарин, Убайдулла аканинг маънавий-маърифий асарлари ёш авлодни Ватанга садоқат, миллий ва умуминсоний қадриятларга ҳурмат-эҳтиром руҳида, адолатпарвар, ҳақиқатсевар, бир сўз билан айтганда, баркамол инсонлар этиб тарбиялашга хизмат қилиши билан аҳамиятлидир.

Ишончимиз комилки, таниқли ҳуқуқшунос Убайдулла Мингбоевнинг қарийб олтмиш йиллик самарали фаолияти бугунги ва келажак авлодлар учун суд тизими, судьялик касби, судьянинг вазифаси ва масъулияти ҳақидаги етарлича фойдали ҳамда ибратли маълумотлар хазинасидир.

Президентимиз таъкидлаганларидек, «Суд ва ҳуқуқни муҳофаза қилувчи идоралар ишига фақат ва фақат халқимизнинг ўзи баҳо беради. Улар учун ягона ва энг қаттиқ талаб – бу фуқароларнинг қонуний манфаатларига хизмат қилиш ва уларнинг ҳуқуқларини ҳар қандай ҳолатда ҳам ҳимоя қилишдан иборат».

Акмал Саидов,

академик

Мамлакатимиз суд-ҳуқуқ тизимида қатъият билан олиб борилаётган туб ислоҳотлар қонун устуворлиги ва одил судловга эришиш имкониятларини янада кенгайтирмоқда. Хусусан, маъмурий суд ишларини тафтиш тартибида кўриш амалиётининг амалга жорий этилгани суд ҳужжатларининг қонунийлиги, асослилиги ва адолатлилигини текширишда муҳим ўрин тутмоқда.

Бу фикрларимизнинг тасдиғи сифатида ҳаётий бир мисолга эътибор қаратамиз. Яъни “Моҳир қўллар” масъулияти чекланган жамият мутасаддилари судга ариза билан мурожаат қилиб, жавобгар Хоразм вилояти солиқ бошқармасининг 2024 йил 1 апрелдаги қарорини ҳақиқий эмас, деб топишни сўраган.

Аммо ушбу даъво аризаси Урганч туманлараро маъмурий судининг 2024 йил 12 июндаги ҳал қилув қарори билан қаноатлантиришдан рад этилган.

Хоразм вилояти маъмурий суди апелляция инстанциясининг 2024 йил 29 июль, шунингдек, вилоят маъмурий суди тафтиш инстанциясининг 2024 йил 22 октябрдаги қарорлари билан биринчи босқич суди қарори ўзгаришсиз қолдирилган. Шундан сўнг масъулияти чекланган жамият мутасаддилари Олий судга тафтиш тартибида мурожаат қилди.

Иш ҳужжатларидан маълум бўлишича, вилоят солиқ бошқармасининг 2023 йил 5 сентябрдаги буйруғига асосан, “Моҳир қўллар” масъулияти чекланган жамиятда камерал солиқ текшируви ўтказиш белгиланган.

Текширув якуни бўйича эса, хулоса тузилиб, масъулияти чекланган жамиятга солиқ ҳисоботига тузатишлар киритиш ҳақида талабнома юборилган.

Аммо масъулияти чекланган жамият томонидан талабномага асосан аниқлаштирилган солиқ ҳисоботи ҳамда асослар тақдим қилинмаган. Шу сабабли, солиқ бошқармасининг 2024 йил 1 февралдаги буйруғига кўра, “Моҳир қўллар” масъулияти чекланган жамиятда солиқ аудити текшируви ўтказиш белгиланган.

Ўтказилган текширув натижалари юзасидан солиқ бошқармасининг 2024 йил 11 апрелдаги қарори билан масъулияти чекланган жамиятга:

– 2022 йил учун фойда солиғига 343 763,7 минг сўм, кечиктирилган ҳар бир кун учун 17 995,05 минг сўм пеня;

– 2023 йил 2-чорак бўйича фойда солиғига 460 644,7 минг сўм;

– Солиқ кодексининг 224-моддасига асосан, 160 881,6 минг сўм, жами 983 285,05 минг сўм жарима ҳисобланган.

Шу ўринда ушбу низоли ҳолатларнинг келиб чиқиш сабабларига батафсил тўхталадиган бўлсак, Хива туман ҳокимининг 2012 йил 1 майдаги 447-сонли қарорига асосан, Хива шаҳри, Амир Темур кўчасида жойлашган умумий ер майдони 20 минг 848,83 квадрат метрдан иборат “Пахта тайёрлов маскани” бино ва иншоотлари ҳамда ер участкаси “Моҳир қўллар” масъулияти чекланган жамиятга тегишли бўлган.

Мазкур кўчмас мулк объекти туман ҳокимининг 2017 йил 22 мартдаги 865-сонли қарорига кўра, Хива шаҳрининг бош режасига асосан, ишлаб чиқилган лойиҳани амалга ошириш жараёнида давлат ва жамоат эҳтиёжлари учун олиб қўйилиши, бино ва иншоотлар бузиб ташланиши белгиланган.

2019 йил 26 январда тарафлар ўртасида 40-сонли келишув шартномаси расмийлаштирилган. Унга кўра, мулк эгаси компенсация тўловидан воз кечиши ва Хива шаҳри ҳокимлиги томонидан белгиланган тартибда Қиёт маҳалласининг 858-сонли контуридан турар жой бинолари қуриш учун 3 гектар ер участкаси ажратиб берилишига келишилган. Бироқ вилоят ҳокимлиги ҳузуридаги комиссиянинг 2019 йил 22 февралдаги йиғилишида ер участкаси алоҳида қимматли ерлар тоифасига кириши сабабли, бу келишув рад этилган.

Келишув шартномаси мажбуриятлари Хива шаҳар ҳокимлиги томонидан бажарилмаганлиги боис, масъулияти чекланган жамият мутасаддилари судга мурожаат қилган.

Хива шаҳар маъмурий судининг 2020 йил 29 сентябрдаги ҳал қилув қарори билан ҳокимлик зиммасига 20 минг 848,83 квадрат метр ер майдонини масъулияти чеклаган жамиятга Хива шаҳар ҳудудидан ажратиб бериш мажбурияти юклатилган.

Аммо шаҳар ҳокимининг 2021 йил 10 апрелдаги 224-сонли қарори билан “Моҳир қўллар” масъулияти чекланган жамиятга суд қарорида кўрсатилганидан анча кам, аниқроғи, 6 минг квадрат метр ер участкаси ажратиб берилган, холос.

Ўз навбатида, компенсация тўлиқ берилмаганлиги сабабли, Ўзбекистон Савдо-саноат палатаси вилоят ҳудудий бошқармаси масъулияти чекланган жамият манфаатини кўзлаб, судга мурожаат қилади. Вилоят суди иқтисодий ишлар бўйича судлов ҳайъатининг 2023 йил 1 мартдаги қарори билан ўзгаришсиз қолдирилган Боғот туманлараро иқтисодий судининг ҳал қилув қарорига асосан, Хива шаҳар ҳокимлигидан “Моҳир қўллар” масъулияти чекланган жамият фойдасига 3 миллиард 70 миллион 965 минг сўм компенсация суммасини ундириш белгиланади.

Солиқ бошқармаси томонидан текширув давомида жамиятнинг банк айланма ҳаракатлари ўрганилганида, жамият ҳисоб рақамига етказилган зарарни қоплаш учун 100 фоиз тўлов, жами 3 миллиард 70 миллион 965 минг сўм ўтказилганлиги аниқланган.

Ушбу аниқланган суммага нисбатан Солиқ кодексининг 297-моддаси учинчи қисми 17-банди ва 301-моддасини қўллаб, фойда солиғи ҳисоблаган.

Айтиш керакки, Солиқ кодексининг 297-моддаси учинчи қисми 17-бандига кўра, қарздор томонидан эътироф этилган ёхуд қарздор томонидан суднинг қонуний кучга кирган ҳужжати асосида шартнома мажбуриятларини бузганлик учун тўланиши лозим бўлган жарималар, пенялар ва бошқа санкциялар, шунингдек, зарарларнинг ўрнини қоплаш суммалари даромадга киради.

Вазирлар Маҳкамасининг 2019 йил 16 ноябрдаги 911-сонли қарори билан тасдиқланган ва 2021 йил 9 июнга қадар амалда бўлган “Ер участкалари олиб қўйилиши ва олиб қўйилаётган ер участкасида жойлашган кўчмас мулк объектлари мулкдорларига компенсация бериш тартиби тўғрисида”ги Низомнинг 37, 38-бандларида, мулкдорларнинг розилиги олингандан сўнг инвестор, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳамда мулкдор ўртасида уч томонлама келишув имзоланиб, нотариал тартибда тасдиқланиши, компенсация миқдори, турлари ва уни бериш муддати келишувда назарда тутилиши қайд этилган.

Мазкур Низом талабларидан келиб чиқиб айтганда, келишув компенсация тўлаб бериш учун асос бўлувчи ҳужжат ҳисобланади. Бироқ келишув асосида масъулияти чекланган жамиятга ер участкаси ажратиб берилмаган.

Суд қарори билан эса, ер участкаси эмас, балки давлат ва жамоат эҳтиёжлари учун олиб қўйилиши белгиланган ер участкасига тенг пул маблағи ундириш белгиланган.

Яна бир эътиборли томони, туман ҳокимлиги масъулияти чекланган жамиятдан қарз олмаган, шу боис, улар ўртасида қарз муносабатлари вужудга келмаган. Компенсация суммаси — шартнома мажбуриятларини бузганлик учун тўланиши лозим бўлган жарималар, пенялар ва бошқа санкциялардан келиб чиқмаган. Қолаверса, компенсация суммаси 2023 йилда тўлаб берилган.

Бунда масъулияти чекланган жамиятга бузилишга тушган ер участкаси ва бино-иншоотларига тенг компенсация берилган, бу ҳолатда жамият кўчмас мулк объектини йўқотган. Лекин потенциал равишда шунга тенг қисман ер участкаси ва пул маблағи олган.

Бухгалтерия ҳисоботида йўқотилган кўчмас мулк юқорида қайд этилган туман ҳокимининг 2017 йил 22 мартдаги 865-сонли қарори бўйича асосий воситаларни тугатиш сифатида бошқа харажатлар ҳисоботида акс эттирилади. Бу – сотиш эмас, балки кўчмас мулк объектини тугатиш бўлган.

Кейинчалик олган компенсация суммаси актив қийматга киритилади.

Компенсация суммаси дастлабки бузилишга тушган ер участкаси қийматига тенг бўлганлиги учун солиқ солиш объектига, яъни солиққа тортиладиган даромадга кирмайди.

Солиқ кодексининг 42-моддасига кўра, нафни баҳолаш имконияти мавжуд бўлган тақдирда ва бундай нафни баҳолаш мумкин бўлган даражада ҳисобга олинадиган пул ёки натура шаклидаги иқтисодий наф даромад деб эътироф этилади. Мазкур кодекснинг 297-моддасида жами даромадларга таъриф берилган бўлиб, ер участкасининг олиб қўйилиши муносабати билан мулкдорларга берилган компенсация даромад сифатида келтириб ўтилмаган.

Шу каби Адлия вазирлиги томонидан 2004 йил 29 августда 1401-сон билан рўйхатга олинган “Асосий воситалар қийматини балансдан чиқариш тартиби тўғрисида”ги Низомда ер участкаси давлат ва жамоат эҳтиёжлари учун олиб қўйилиши сабабли асосий воситаларнинг корхона балансидан чиқиб кетиши назарда тутилмаган.

Маъмурий суд ишларини юритиш тўғрисидаги кодекснинг 266-7-моддаси биринчи қисми 2-бандига кўра, суд шикоятни (протестни) тафтиш тартибида кўриш натижалари бўйича ҳал қилув қарорини, қарорни тўлиқ ёки қисман бекор қилишга ва янги қарор қабул қилишга ҳақли.

Юқоридагилардан келиб чиқиб, судлов ҳайъати қуйи инстанция судларининг қарорларини қисман бекор қилишни, бекор қилинган қисми бўйича аризани қисман қаноатлантириб, низоли қарорнинг 2023 йил иккинчи чорак бўйича фойда солиғига 460 миллион 644 минг 700 сўм ва унга ҳисобланган 92 миллион 128 минг 940 сўм жарима қўллаш қисмини ҳақиқий эмас, деб топиш ҳақида янги қарор қабул қилишни лозим топди.

Шундай қилиб, Урганч туманлараро маъмурий судининг 2024 йил 12 июндаги ҳал қилув қарори, Хоразм вилоят маъмурий суди апелляция инстанциясининг 2024 йил 29 июлдаги қарори ва вилоят маъмурий суди тафтиш инстанциясининг 2024 йил 22 октябрдаги қарори қисман бекор қилинди. Вилоят солиқ бошқармасининг 2024 йил 1 апрелдаги 193-сонли қарорининг 2023 йил 2-чорак бўйича ҳисобланган фойда солиғи ва унга ҳисобланган жарима қисми ҳақиқий эмас, деб топилди.

Солиқ идорасининг низолашилган қарорининг қолган қисмини ҳақиқий эмас, деб топиш учун асослар мавжуд бўлмаганлиги, 2022 йил учун фойда солиғи тўғри ҳисобланганлиги сабабли, низолашилган қарорининг шу қисмини рад этиш ҳақидаги қуйи инстанция судларининг хулосалари ўзгаришсиз қолдирилди.

Дурдона АБДУҚАҲҲОРОВА,

Олий суд судьяси

Ўтган йил гурланлик икки нафар фуқаро: туман Электр таъминоти корхонасининг истеъмолчилар билан ишлаш бўлими муҳандиси Зоир Ўрозматов (исм-шарифлар ўзгартирилган) ва “Xorazm Shoh Abbos” масъулияти чекланган жамияти раҳбари Эркин Сафарниёзовга нисбатан жиддий айблов эълон қилинди.

Аниқроғи, тергов органи Электр таъминоти корхонаси муҳандиси З. Ўрозматовга нисбатан аҳоли ва улгуржи истеъмолчиларни электр энергияси билан таъминлаш ва ундан фойдаланиш қоидаларини қўпол тарзда бузгани учун “гаров” эҳтиёт чорасини қўллаб, оиласи бағрида қолдирилган бўлса, тадбиркорлик корхонаси раҳбари Э. Сафарниёзовни вақтинчалик ҳибсга олди. Қўзғатилган жиноят иши тафсилотлари эса, тафтиш-тергов жараёнларида аниқланди. Айбловга оид ҳужжатларда қайд қилинишича, электр таъминоти корхонаси масъул ходими З. Ўрозматов 2021 йилнинг июль ойида тадбиркор Э. Сафарниёзовнинг сўровига биноан, унга қарашли ғишт заводи ҳудудида “TЕ-73 S-G 1-3” русумли, “114210105929” рақамли электр ҳисоблагични ўрнатиш ишларига бош-қош бўлган. Мазкур ускуна тергов даврида шахсини аниқлаш имкони бўлмаган ёлланма ишчилар томонидан ўрнатилган. Бу жараёнда ускунанинг “В” ва “С” фазалари технологик қоидага хилоф равишда алмаштириб уланган.

Натижада ускунанинг қувват коэффиценти сезиларли даражада сусайиб, электр энергиясини фойдаланганидан анча кам ҳисоблаган. Бу ҳол 2021 йилнинг июль ойидан то 2024 йилнинг июль ойигача давом этган.

З. Ўрозматов қурилма умумий фойдаланишдаги электр тармоғига уланганидан сўнг ёлланма ишчилар томонидан хатоликка йўл қўйилганини жойига бориб ўрганмаган. Йўл қўйилган хатоликнинг оқибатлари ундан кейин ўтказилган назорат тадбирлари чоғида ҳам аниқланмаган. 2024 йилнинг 7 июль куни амалга оширилган навбатдаги назорат тадбири якунлари бўйича расмийлаштирилган 33208-07/01.24-сонли далолатномага қалбаки ёзувлар киритилган: ғишт заводи биносига ўрнатилган электр ҳисоблагич амалдаги қоидага биноан тўғри улангани, ускуна кўрикдан ўтказилгани, ўлчов асбобида камчиликлар аниқланмагани, электр қурилмаси бир маромда ишлаётгани қайд қилинган. Гумонланувчилар айни шу куни масьулияти чекланган жамияти ва корхона ўртасида янгидан тузилган 149277-сонли шартномани электр тармоқлари корхонасига тақдим қилишган. Расмийлаштирилган ҳужжат Э. Сафарниёзовга қарашли ғишт заводини электр энергияси билан узлуксиз таъминлашга янада кенг йўл очган. Ҳар икки мутасаддининг қонунга зид ҳаракати 2024 йил 19 июлда Республика ишчи гуруҳи ва “Ўзэнергоинспекция”нинг Хоразм вилояти бошқармаси томонидан ўтказилган тадбир жараёнида барҳам топган. “В” ва “С” фазали электр симлари алмаштирилган ҳолда улангани махсус техник мутахассис ходимлар иштирокида ўтказилган текшириш асносида аниқланган.

Симларнинг алмаштириб улангани ва корхонага ўрнатилган электр трансформатори ҳамда ҳисоблагич соз ҳолда ишлаётгани юзасидан 2024 йил 7 июлда расмийлаштирилган далолатнома катта миқдордаги талон-торожлик ва бу борадаги хатти-ҳаракатларнинг давом этишига сабаб бўлган. Дастлабки тафтиш ва терговгача ўтказилган тадбирнинг ўзидаёқ жами 222 миллион сўмлик электр энергиясини ўғирлаш ҳолати юз бергани маълум бўлган.

Бу каби ҳолатларнинг бари пировардида текширувчи шахслар, тафтиш ва тергов идоралари ходимлари, бир қатор гувоҳлар томонидан ўзаро тил бириктирган ҳолда содир қилинган жиддий қонунбузарлик сифатида талқин этилди. Содир қилинган қилмиш Жиноят кодексининг ўғирликка доир 169-моддаси 4-қисми “а” банди ва қалбакилаштиришга оид 228-моддаси 2-қисми “б” банди билан малакаланди.

…Судга ҳавола қилинган жиноят иши содир этилган қилмиш тафсилотларини тўлиқ ифода этди. Суд бу ҳолатларни алоҳида эътироф қилди. Бу жараёнда масаланинг бир қатор янги жиҳатлари ҳам намоён бўлди. Судда кўрсатма берган вилоят Ҳудудий электр тармоқлари акциядорлик жамиятининг етакчи муҳандиси Илҳом Саидов ҳажми 222 миллион сўм қилиб кўрсатилган камомад ғишт заводидаги ҳисоблагичнинг эмас, балки электр таъминоти корхонасидаги бош электрон ҳисоблаш ускунасининг техник нозозлиги боис келиб чиққани, ундаги чалкашлик оқибатида истеъмол қилинган электр энергияси нотўғри ҳисоблангани, ҳозирга келиб, бу камчилик бартараф қилинганини таъкидлади. Гувоҳнинг сўзига қараганда, корхонадаги электр ҳисоблагичнинг “В” ва “С” фазали симлари З. Ўрозматов ва Э. Сафарниёзовнинг ўзаро тил бириктириш натижасида қасддан ва ғаразли мақсадда алмаштириб улангани ҳақидаги даъво асоссиз. Бу жиддий хато ҳисоблагични бевосита тармоққа улаган шахс ёки шахсларнинг бепарволиги, техник хатоси оқибатида содир этилгани ҳақиқатга яқинроқ.

Судда гувоҳлик берган вилоят “Ҳудудий электр тармоқлари” акциядорлик жамиятининг электр энергиясини автоматлаштирилган ва электрон тарзда ҳисоблаш бўлими бошлиғи Санжар Худойберганов масаланинг бу жиҳатини янада батафсилроқ изоҳлади, ҳисоблагични техник кўрикдан ўтказиш жараёнида истеъмолчи ундан қандай бўлса, шундайлигича фойдаланиб келгани, ускуна тармоққа уланганидан буён ўтган 3 йил мобайнида унга ташқи томондан бирон-бир тарзда таъсир кўрсатилмагани аниқланганини билдирди.

Бу фикрни бошқа гувоҳлар ҳам тасдиқлади. Бу борадаги асл ҳақиқат судга ҳавола этилган аксарият ҳужжатлар, факт ва далилларда намоён бўлди.

Х. Сулаймонова номидаги Республика суд экспертиза маркази ва Республика ишчи гуруҳи ҳамда “Ўзэнергоинспекция” маҳкамасининг “Хоразм Шоҳ Аббос” масъулияти чекланган жамиятида ўтказган назорат-текшириш тадбири юзасидан тузилган хулосалар масалага узил-кесил ойдинлик киритди. Экспертиза маҳкамасининг хулосасида қайд этилишича, масъулияти чекланган жамиятига қарашли ғишт ишлаб чиқариш заводига 2021 йилнинг июль ойида ўрнатилган электр ҳисоблагичга 2024 йилнинг июль ойигача бўлган муддат ичида ташқи тарафдан таъсир кўрсатиш ҳолати ёки уни ўрнатиш жараёнида хатоликка йўл қўйилганига оид маълумотлар мавжуд эмас. Махсус комиссиянинг маълумотномасида эса, истеъмолчига дахли бўлмаган техник хатолик сабабли, ҳисобга олинмаган электр энергиясининг ҳақиқий миқдори 246 минг 686 киловаат соатни ташкил этгани қайд қилинган.

Бундай вазиятда истеъмолчини электр энергиясини ўғирлаш йўли билан талон-торож этганликда айблаб бўлмайди. Мазкур айбни тасдиқловчи далилларнинг мавжуд эмаслиги шуни тақозо этади. Вазирлар Маҳкамасининг 2024 йил 31 майдаги 319-сонли қарорига асосан тасдиқланган “Электр энергиясидан фойдаланиш қоидалари”нинг 135-бандига кўра, ҳисоблаш тизимига таъсир қилмаган ҳолда, иккиламчи ток занжиридаги кириш ва чиқиш симлари ўзаро алмаштириб уланган ҳолатлар учун истеъмолчини айблаб бўлмайди. Судга ҳавола этилган жиноят ишида эса, масъулияти чекланган жамиятига қарашли ғишт заводига ўрнатилган электр ҳисоблагичга З. Ўрозматов ва Э. Сафарниёзов томонидан ташқи таъсир кўрсатилгани, ундаги уланиш қоидалари жиноий тил бириктирган ҳолда қасддан алмаштирилганини тасдиқлайдиган ишончли далиллар мавжуд эмас ва бундай далиллар судлов жараёнида ҳам аниқланмади.

Суд бу ҳолатларни эътиборга олди. Шунингдек, жиноят иши очилишига туртки бўлган омиллар, ҳуқуқни муҳофаза қилувчи идоралар томонидан тўпланган ҳужжатлар ҳамда мазкур органларнинг ташаббусига асосан, терговга жалб қилинган шахсларнинг гувоҳлик кўрсатмалари ҳам инобатга олинди. Шу билан бирга суд қонундаги айбсизлик презумпцияси, далилларнинг мақбуллиги прниципига алоҳида эътибор қаратди.

Шуни таъкидлаш жоизки, қонун талабига кўра, айблов ҳукми суд жараёнида маълум бўлиб қолган барча кам-кўстлар тўлдирилган, юзага келган ҳамма шубҳа ва қарама-қаршиликлар бартараф этилган ҳамда ишончли далиллар йиғилган тақдирдагина чиқарилади.

Амалда ҳам шундай бўлди. Уқтирилганидек, электр энергиясини ўғирлаш йўли билан талон-торож қилишга қаратилган ножўя хатти-ҳаракатлар бўйича таъминот корхонаси масъул ходими З. Ўрозматов ва тадбиркор Э. Сафарниёзовни айблаш юзасидан илгари сурилган даъвони етарлича тасдиқловчи далил-исботлар топилмади. Суд ана шу асосга кўра, ҳар иккала айбланувчини Жиноят кодексининг 169-моддаси 4-қисми “а” банди бўйича оқлаб, қўйилган айбни уларнинг зиммасидан соқит қилди.

Суд жараёнида Жиноят кодексининг 228-моддаси 2-қисми “б” бандида назарда тутилган ножўя ҳаракат тафсилотлари ҳам тўлиқ ойдинлашди.

Мазкур қилмиш, чиндан ҳам, содир этилгани аниқланди. Бироқ рўй берган қилмиш ижтимоий хавфлилик хусусиятини йўқотгани эътироф қилинди.

Жиноят кодексининг 70-моддаси бу сингари ҳолатларда тайинланиши муқаррар бўлган жазони сезиларли даражада енгиллаштиришни тақозо этади. Суд кодекснинг ана шу талабига биноан, Зоир Ўрозматов ва Эркин Сафарниёзовни жазодан озод қилди.

Адолат ва одиллик принципи ана шу тариқа тантана қилди. Башарти, синчковлик салоҳияти, билим ва малака бисёр бўлгани, етти ўлчаб, бир кесилганида зикр қилингани янглиғ кўнгилсиз ҳолат содир бўлмасди. Бу эса кўпчиликка сабоқ бўлиши керак.

Шуҳрат РАЗЗОҚОВ,

Хоразм вилояти суди

жиноят ишлари бўйича судьяси

Ҳаётда ходим билан тузилган меҳнат шартномасини бекор қилишда шошмашошарликка йўл қўйиш ҳеч қачон яхшиликка олиб келмайди. Аниқроқ айтганда, айби қонуний тарзда исботланмай туриб, ходимни ишдан четлатишга уриниш турли хил дилхираликлар келиб чиқишига сабаб бўлади.

Давлат кадастрлар палатаси Пахтачи тумани филиали раҳбари З. Нуриллаевни (исм-шарифлар ўзгартирилди) кутилмаганда шошилинч тарзда вилоят бошқармасига чақиришди.

З. Нуриллаев бошқармага етиб келгач, кутилмаганда нега шошилинч чақиришганининг сабаби аён бўлди. Пахтачи туманида яшайдиган С. Бобоқулов З. Нуриллаевнинг устидан Давлат кадастрлар палатаси вилоят бошқармаси бошлиғи номига шикоят билан мурожаат қилган экан.

Бор-йўқ гап шу.

Аммо бошқарма мутасаддилари аллақачон ҳаммасини ҳал этиб қўйишган экан. Шу боис унга “вақтинчалик ишдан бўшаш тўғрисида ўз ихтиёрингиз билан тезда ариза ёзинг, ёзмаган тақдирингизда, хизмат текшируви тайинлатилади, барибир ишдан бўшатиласиз” дейишди.

Буларни эшитиб, З. Нуриллаев, табиийки, гангиб қолди ва ўзининг айбсиз эканлиги, шикоят ариза асоссизлигини айтса-да, унинг гапларига ҳеч ким қулоқ солмади.

Фақат вазият ўнгланиб кетса, уни яна вазифасига ишга қабул қилишга ваъда беришди.

Қисқаси, З. Нуриллаев аросатда қолади. Охир-оқибат эса, бошқарма мутасаддиларининг қистови билан ариза ёзишга мажбур бўлади. Бу воқеа ўтган йил 5 ноябрь куни рўй берганди. Айнан шу санада З. Нуриллаев билан тузилган меҳнат шартномасини бекор қилиш бўйича иш берувчи билан Меҳнат кодексининг 157-моддаси талабидан келиб чиқиб, келишув битими имзоланади.

Хўш, З. Нуруллаев ишдан қонуний тарзда бўшатилдими?

Бу саволга бир сўз билан “йўқ” деб жавоб бериш мумкин. Чунки аввало, Давлат кадастрлар палатаси Самарқанд вилояти бошқармаси мутасаддилари туман филиали раҳбарини ишдан четлатиш ваколатига эга эмас. Вазирлар Маҳкамасининг 2021 йил 12 февралдаги 66-сон қарори ҳамда Кадастр агентлиги директорининг 2023 йил март ойидаги 77-14-сонли буйруғига кўра, филиал раҳбарлари меҳнат шартномаси асосида Кадастр агентлиги директори томонидан лавозимга тайинланади ва лавозимидан озод этилади.

Шу ўринда юқоридаги воқеага ойдинлик киритадиган бўлсак, бошқарма мутасаддилари З. Нуриллаевнинг аризасини Иқтисодиёт ва молия вазирлиги ҳузуридаги Кадастр агентлиги директори С. Маҳмудовга юборишади. Ўз навбатида, С. Маҳмудов З. Нуриллаев билан юзма-юз суҳбатлашмай туриб, устига-устак, шахсан ўзи ариза олмасдан туриб, 2024 йил 13 ноябрь санаси билан ишдан бўшатиш тўғрисида буйруқ чиқаради.

Буни қарангки, орадан кўп ўтмай Пахтачи туман прокуратураси томонидан З. Нуриллаевнинг устидан шикоят қилган фуқаронинг мурожаати ўрганиб чиқилади. Шикоятда кўрсатилган важлар ўз тасдиғини топмайди, З. Нуриллевнинг айбсиз эканлиги аниқланади.

Шундан сўнг З. Нуриллаев ўзининг бузилган ҳуқуқларини тиклашни сўраб, фуқаролик ишлари бўйича судга мурожаат қилади.

Судда аниқланган ҳолатларга кўра, даъвогарнинг ишдан бўшатилиши ҳақидаги буйруқ чиқарилишига асос сифатида тарафларнинг келишуви ва З. Нуриллаевнинг аризаси асос қилиб олинган.

Шу ўринда қонун талабига эътибор қаратсак, Меҳнат кодексининг 157-моддасига кўра, номуайян муддатга тузилган меҳнат шартномаси, шунингдек, муддатли меҳнат шартномаси исталган вақтда, тарафларнинг келишувига кўра, бекор қилиниши мумкин. Меҳнат шартномаси мазкур асос бўйича бекор қилинадиган сана ходим ва иш берувчи ўртасидаги келишувга биноан белгиланади.

Меҳнат шартномасини тарафларнинг келишувига кўра, бекор қилиш меҳнат шартномасига доир қўшимча келишув билан ёзма шаклда расмийлаштирилади, унда меҳнат шартномаси бекор қилинадиган сана, қўшимча келишув тузилган сана ва тарафларнинг реквизитлари кўрсатилиши шарт.

Шунингдек, Олий суд Пленумининг 2023 йил 20 ноябрдаги “Судлар томонидан меҳнат шартномасини бекор қилишни тартибга солувчи қонунчиликни қўллаш амалиёти тўғрисида”ги 26-сонли қарори 14-бандида тушунтирилишича, судлар тарафларнинг келишувига кўра, (Меҳнат кодексининг 157-моддаси) меҳнат шартномаларининг барча турлари ва уларнинг ҳар қандай вақтда бекор қилиниши мумкинлигини эътиборга олишлари керак.

Тарафларнинг келишуви меҳнат шартномасига доир қўшимча келишув билан ёзма шаклда расмийлаштирилади, унда меҳнат шартномаси бекор қилинадиган сана, қўшимча келишув тузилган сана ва тарафларнинг реквизитлари кўрсатилиши керак.

Меҳнат шартномасини, ушбу асосга кўра, бекор қилиш юзасидан низо чиққан тақдирда, судлар мазкур тартибга ва қўшимча келишув шартларига риоя қилинган-қилинмаганлигини текширишлари лозим.

Даъвогар З. Нуриллаевнинг ишдан бўшаш ҳақидаги аризасида меҳнат шартномасини 2024 йил 5 ноябрь кунидан бекор қилиш сўралган. Лекин иш берувчи томонидан даъвогарни ишдан бўшатиш тўғрисидаги буйруқ 2024 йил 13 ноябр куни чиқарилган.

З. Нуриллаев эса, 2024 йил 12 декабрь кунига қадар иш фаолиятини давом эттирган. Бу ҳолат фуқаролик ишида мавжуд бўлган даъвогар З. Нуриллаев томонидан бошқарма бошлиғига, турли давлат ташкилотлари ҳамда фуқароларга филиал бош­лиғи сифатида юборилган сўров хатлари ва сўров хатларига берилган жавобларда аниқ кўриниб турибди.

Бундан ташқари “Топшириш – қабул қилиш тўғрисида”ги далолатнома ҳам 2024 йил 12 декабрь куни тузилган. Бу ҳолат ҳам даъвогар З. Нуриллаев филиал раҳбари сифатида шу санага қадар ишлаб келганидан далолат беради ва бундай ҳолатда ишдан бўшаш тўғрисидаги ариза ўз кучини йўқотган ҳисобланади.

Олий суд Пленумининг “Судлар томонидан меҳнат шартномасини бекор қилишни тартибга солувчи қонунчиликни қўллаш амалиёти тўғрисида”ги 26-сонли қарори 21-бандида қайд этилишича, меҳнат шартномасини бекор қилишга ходим шу ташкилотдаги ишни ҳақиқатда ташлаб кетиш истагини билдирган ёзма аризасига биноан йўл қўйилади.

Судлар даъвогарнинг меҳнат шартномасини бекор қилиш ҳақидаги аризани иш берувчининг қистови натижасида берганлиги тўғрисидаги важларини синчковлик билан текширишлари лозим.

Бунда судларнинг эътибори ходимни ариза ёзишга нафақат мажбурлаш, босим ёки тазйиқ ўтказиш, балки ходимда меҳнат муносабатларини тугатиш истаги бўлмай туриб, иш берувчи томонидан уни ариза ёзишга фаол равишда ундаш ҳаракатлари ҳам қистов сифатида баҳоланиши лозимлигига эътибор қаратиш зарурлиги қайд этилган.

З. Нуриллаев судга тақдим этган даъво аризасида меҳнат шартномасини бекор қилиш ҳақидаги келишувга ўз ихтиёри билан эмас, балки иш берувчининг тазйиқи ва босим ўтказиши оқибатида имзо қўйгани, агар келишувга имзо қўймаса, бошқа модда, яъни меҳнат шартномасини иш берувчининг ташаббусига асосан бекор қилинишини айтиб, уни келишув тузишга мажбур қилишганини таъкидлаган.

Қонун талабига кўра, ходимнинг аризаси, ҳақиқатан ҳам, унинг ишдан бўшаш истаги ва ташаббусини билдирувчи асосий ҳужжат саналади. Аммо З. Нуриллаевни ишдан бўшатиш ташаббуси, аслида, раҳбардан чиққан.

Туман прокуратураси томонидан ўтказилган терговга қадар бўлган суриштирув натижалари ҳам ходимдан ишдан бўшаш ҳақидаги аризани қистов, босим ва тазйиқ йўли билан олинганлигини тасдиқлайди.

Меҳнат кодексининг 561-моддасига кўра, меҳнат шартномаси асоссиз бекор қилинган, ғайриқонуний равишда бошқа ишга ўтказилган, меҳнат шартлари ўзгартирилган ёхуд ишдан четлаштирилган ҳолларда якка тартибдаги меҳнат низосини кўриб чиқувчи орган ходимни аввалги ишига, шунингдек, аввалги меҳнат шартларини ҳам тиклайди.

Суд юқорида кўрсатилган қонун талабларидан келиб чиқиб, даъвогар З. Нуриллаев босим остида ишдан бўшаш ҳақида ариза ёзганини инобатга олди. Шу боис Кадастр агентлигининг 2024 йил 13 ноябрдаги 00281-сонли буйруғини ғайриқонуний деб топди ва бекор қилди. З. Нуриллаев Давлат кадастрлари палатаси Пахтачи туман филиали бошлиғи вазифасини вақтинча бажарувчи лавозимига ишга тикланди. Жавобгар — Кадастр агентлигидан З. Нуриллаев фойдасига мажбурий бекор юрган кунлари учун, солиқ ва мажбурий тўловлар сақланган ҳолда, 46 миллион 316 минг 481,7 сўм иш ҳақи ҳамда маънавий зарар учун 10 миллион сўм товон ундирилди.

Хулоса шуки, Конституция ва қонунлар ҳамиша устувор саналган юртимизда адолат – одил судлов мезони сифатида яна бир карра ўз исботини топди.

Зафар РАВШАНОВ,

фуқаролик ишлари бўйича

Каттақўрғон туманлараро судининг раиси,

Абдуҳамид ХУДОЙБЕРДИЕВ,

журналист

Ўттиз бир ёшли Муҳайё Даминова (исм-шарифлар ўзгартирилган) бир нафар фарзанднинг онаси. У Балиқчи туманидаги мактабгача таълим ташкилотларидан бирида ёрдамчи тарбиячи – энага вазифасида ишларди. Аммо у ҳалол меҳнат билан рўзғор тебратиш ўрнига нафс қутқусига учиб, қинғир ишга қўл урди.

Аниқроқ айтганда, М. Даминова бундан 7-8 йил аввал тумандаги боғчаларда амалга оширилаётган бунёдкорлик ва ободонлаштириш ишлари ҳамда таълим-тарбия жараёнига оид янгиликларни Facebook ижтимоий тармоғида ёритиб борарди. Албатта, бундан кўпчилик хурсанд бўларди. Бироқ вақт ўтиши билан унинг нияти бузилди. Аниқроғи, мактабгача таълим муассасаларидаги хато ва камчиликлар ёки қонунбузилиш ҳолатларини аниқлаб, уларни ошкор қилмаслик эвазига таъмагирлик қила бошлади.

Ўшанда 2022 йилнинг март ойи эди. М. Даминова тумандаги 7-сонли давлат мактабгача таълим ташкилоти мудираси М. Норбобоевага қўнғироқ қилади.

— Ҳам боғчадаги ишлар, ҳам сизнинг устингиздан шикоят бор, — дейди М. Даминова кутилмаганда дағдағали оҳангда.

— Қанақа шикоят экан? — ҳайрон бўлиб сўрайди мудира.

Бунга жавобан М. Даминова ходимлар унинг боғчага мудира этиб тайинланганидан норози экани, бунинг устига боғчада ҳам таълим-тарбия ишлари яхши эмаслигини айтаркан, буларни “Facebook” ижтимоий тармоғига чиқармаслик эвазига 100 АҚШ доллари беришини талаб қилади.

М. Норбобоева унинг ваҳимали сўзларини эшитиб, бирдан довдираб қолади ва унинг талабига рози бўлади: 100 АҚШ доллари ҳисобидан 1 080 000 сўм пул маблағни М. Даминованинг пластик картасига ўтказиб беради.

Ўша йили апрель ойида эса, М. Даминова тумандаги 1-давлат мактабгача таълим муассасаси мудираси Х. Аҳмаджоновага нисбатан товламачилик содир этади.

Аниқроғи, унинг Лочинбек исмли йигит билан шахсий муносабатларига оид ёзишмаларидан хабари борлигин айтаркан, бу ҳақда оиласи ва яқин қариндошларига хабар беришни, ҳатто “Facebook”да эълон қилишини айтиб, қўрқитади. Бундай кутилмаган дағдағадан қўрқиб кетган мудира товламачи сўраган 500 АҚШ долларидан 4 528 000 сўмга тенг 400 АҚШ долларини беришга мажбур бўлади.

Орадан уч ой ўтгач, яъни 2022 йил 29 июлда товламачи бу аёл тумандаги 14-умумтаълим мактаби директори Ш. Нурматовани нишонга олади.

— Ялангоёқ бўп олиб, қоматингизни кўз-кўз қилиб, ҳиндча қўшиққа роса ўйнабсиз, — дейди у мактаб директорига кинояли оҳангда.

Шундан сўнг мақсадга ўтади:

— Хуллас, ўз хоҳишингиз билан ишдан бўшаш тўғрисида розилик хати ёзиб берасиз. Йўқса, рақсга тушган видеонгизни “Facebook”да кўрасиз…

Бу гапларни эшитиб, бирдан қўрқиб кетган Ш. Нурматова ялинишга тушади:

— Илтимос, жон синглим, унақа қилманг…

Директордан худди шу илтижони кутиб турган товламачи аёл очиқ-ошкор 500 АҚШ доллари беришини талаб қилади. Чорасиз қолган мактаб раҳбари эса, 3 272 433 сўмга тенг бўлган 300 АҚШ долларини унга қўшқўллаб топширади.

Шу тариқа М. Даминова 2023 йил февраль ва март ойларида яна аввалги усулда товламачилигини давом эттириб, тумандаги 9 ҳамда 35-давлат мактабгача таълим муассасаси мудиралари Д. Маҳмудова ва М. Ҳамдамоваларнинг ҳар биридан 500 АҚШ доллари миқдорида маблағни қўлга киритади.

Буни қарангки, 2024 йилнинг март ойига келиб, юқорида тилга олинган 7-сонли боғча мудираси М. Норбобоева яна М. Даминованинг “тузоғи”га илинади. Лекин бу пайтда у тумандаги 36-сонли давлат мактабгача таълим муассасаси мудирлигига тайинланганди.

— Боғчангизни СЭС текшириб, камчилик топганидан хабарим бор. Агар шу камчиликларни “Facebook” орқали тарқатсам, боғчангизни ёпиб қўйишади. Қолаверса, обрўингизга ҳам путур етади, — дейди М. Даминова.

Аввал ҳам бу товламачи аёлга “иши” тушган М. Норбобоева унинг ниятини англаб, дарров мақсадга ўтади:

— Хўш, қанча беришим керак?

— Тушунган аёлсиз-да, опагинам, — дейди М. Даминова мамнун бўлганча. – Кўп эмас, бир ярим минг…

М. Норбобоева товламачининг талабини эшитиб эсанкираб қолади. Бироқ у билан тортишиш бефойда эканини тушуниб, талаб қилган маблағни беради.

Бу товламачи аёл тумандаги 25-умумтаълим мактаби директори М. Турсуновдан ҳам видео тасвирни “Facebook” ижтимоий тармоғига жойламаслик эвазига 2 000 АҚШ доллари беришни талаб қилади.

Оқибатда мактаб директорининг 1 500 АҚШ долларини қўлга киритади.

Ўтган йилнинг 6 ноябрь куни соат 10.00 ларда М. Даминова Балиқчи тумани мактабгача ва мактаб таълими бўлими мудири Н. Ҳакимовага қўнғироқ қилади ва қаердасиз, деб сўрайди.

— Иш жойимдаман, — дейди Н. Ҳакимова кутилмаганда асаби бузилиб.

Орадан кўп ўтмай унинг олдига М. Даминова етиб келади.

— Учта боғча мудираси устидан шикоят бор, — дейди у салом-аликдан сўнг.

— Қайси мудиралар?

— Ўн тўрт, ўттиз бир ва ўттиз учинчи боғча мудиралари устидан шикоят қилишган.

— Нима деб шикоят қилишибди? — деб сўрайди Н. Ҳакимова.

Унга жавобан товламачи аёл бирма-бир изоҳ беради:

— Ўн тўртинчи боғча мудираси умуман ишга келмас экан. Ишни масофадан туриб бошқарармиш, ўрнига ҳамшираси иш юритади. Ўттиз биринчи боғчада тайёрланган овқатдан пашша чиққан, менда видеотасвирлари ҳам бор.

— Қани менга кўрсатинг-чи, ўша видеотасвирни?!

— Йўқ, кўрсатмайман, ким юборганини ҳам айтмайман, – дейди М. Даминова. – Ўттиз учинчи боғчанинг мудираси ҳам ишга бориб-бормайди. Қолаверса, у Шербек исмли йигит билан гаплашиб юради. Хуллас, учала мудирангизни чақириб, тегишли чора кўрасизми ёки ўзим бу масалани бошқарма бошлиғингизга олиб чиқайми?

— Майли, ўзим гаплашаман, чора кўраман, — дея Н. Ҳакимова вазиятни юмшатади.

Қисқаси, Н. Ҳакимова ўша куниёқ 31 ва 33-мактабгача таълим муассасалари мудираларини чақириб, суҳбатлашади. М. Даминова айтган камчиликлар, чиндан ҳам, бор-йўқлигини, агар мавжуд бўлса, дарҳол бартараф этиш лозимлигини уқтиради. Бироқ 14-боғча мудираси билан гаплашишга улгурмайди. Эртаси куни эса, иш юзасидан Андижон шаҳрига, вилоят мактабгача ва мактаб таълими бошқармасига мажлисга борганда, кимдир унга қўнғироқ қилиб, Балиқчи туман ички ишлар бўлимига етиб боришини айтади.

Н. Ҳакимова туман ИИБга келгач, маълум бўладики, М. Даминова ўз жиноятига туман мактабгача ва мактаб таълими бўлими ходими Зулайҳо Арзиевани ҳам шерик қилган экан. Яъни М. Даминова З. Арзиевага 14-давлат мактабгача таълим муассасасига оид салбий маълумотлар борлигини айтади. Сўнг ушбу маълумотларни Мактабгача ва мактаб таълими вазирлигига тақдим қилмаслик эвазига мудира Гулзода Насруллаева 600 АҚШ доллари беришини талаб қилади. З. Арзиева эса гўёки “Элчига ўлим йўқ” қабилида иш тутиб, бу талабни Г. Насруллаевага етказади.

— Қандай маълумотлар экан? — ҳайрон бўлиб сўрайди боғча мудираси.

— Билмадим, айнан нималигини менга айтмади, — дейди З. Арзиева.

Шундан сўнг Гулзода Насруллаева ўйлай-ўйлай М. Даминова ва З. Арзиеванинг хатти-ҳаракатлари юзасидан ҳуқуқни муҳофаза қилувчи идорага мурожаат қилади. Оқибатда З. Арзиева Г. Насруллаевадан талаб қилинган 600 АҚШ долларини олган вақтда ашёвий далил билан ушланади.

Бинобарин, тезкор тадбир давом эттирилади. Яъни М. Даминова З. Арзиевадан 600 АҚШ долларини олиб, 100 АҚШ долларини унга улуш сифатида қайтарган пайтида қўлга олинади.

Мазкур ҳолат юзасидан жиноят иши қўзғатилади. Тергов-суриштирув жараёнида М. Даминованинг қариндошлари 25-мактаб директори М. Турсуновга етказилган 1 500 АҚШ доллари миқдоридаги моддий зарарни қоплашади.

Шундан сўнг ушбу иш жиноят ишлари бўйича Балиқчи туман судида кўриб чиқилди. Суд М. Даминовани Жиноят кодексининг 165-моддаси 2-қисми “а”, “в” бандлари, З. Арзиевани эса, шу модданинг 2-қисми “в” банди билан айбдор деб топиб, тегишли муддатга озодликдан маҳрум қилиш жазоси тайинлади. Шунингдек, суд ҳукмида М. Даминовадан жабрланувчи М. Норбобоева фойдасига жами 20 миллион 595 минг сўм моддий зарар ундириш ҳам белгиланди.

Албатта, М. Даминованинг тубан қилмиши — товламачиликни ўзига касб қилиб олиши ўта афсусланарлидир. Чунки у, аввало, аёл, нафс қутқусига учмай фарзандига, оиласига меҳр кўрсатганида, бошига бу ташвиш тушмас, иснодга қолмасди.

Бу воқеани баён этишдан мақсад шуки, жамиятда ҳар қандай жиноий қилмиш жазосиз қолмайди. Буни ҳеч қачон унутмаслик жоиз.

Улуғбек ШЕРАЛИЕВ,

жиноят ишлари бўйича

Балиқчи тумани суди раиси